Kuva uku kwezi k’Ukuboza kwatangira, hagaragaye iri hejuru y’abandura ndetse n’abahitanwa na COVID-19, aho n’inzego z’ubuzima zemeza ko iki cyorezo kimaze kugira ubukana mu Rwanda, buruta ubwo cyagize mu yandi mezi yose yabanje.
Kuri uyu munsi w’icyumweru tariki 20 Ukuboza 2020, ni ubwa mbere mu Rwanda humvikanye inkuru y’ abantu bane bapfuye mu masaha 24 bazize COVID-19. Muri bo harimo abagore babiri barimo umwe w’imyaka 43 n’uw’imyaka 63 hamwe n’umugabo w’imyaka 52 b’i Kigali, ndetse n’undi mugabo w’imyaka 68 w’i Rubavu.
Ibi bibaye nyuma y’aho abandi babiri bapfuye batangajwe ku munsi w’ejo, abamaze gupfa mu Rwanda kuva muri werurwe Covid-19 yagera mu Rwanda, bakaba bamaze kugera kuri 63 bangana na 0.9% by’abamaze gutahurwaho icyo cyorezo.
Uyu munsi hakize abantu bashya babiri, bituma umubare w’abamaze gukira uguma ku 6,091 bangana na 83.5% by’abamaze gutahurwaho icyo cyorezo mu Rwanda barimo 61 batahuwe mu masaha 24 ahize.
Abarwayi bashya babonetse uyu munsi barimo abo mu Mujyi wa Kigali 6, abo mu Karere ka Rubavu 25, abo muri Muhanga 13, muri Huye 9, Musanze 4, Gakenke 2, Kirehe 1 n’undi umwe wo mu Karere ka Nyanza.
Kugeza ubu abarwayi batahuweho iki cyorezo bose babonetse mu bipimo 690,221 birimo 3,545 byafashwe uyu munsi.
Muri Afurika abamaze kwandura COVID-19 bamaze kurenga miriyoni ebyiri n’ibihumbi 490, barimo abantu barenga miriyoni ebyiri n’ibihumbi 94 bakize, n’abandi basaga ibihumbi 58.7 bahitanywe na cyo. Abamaze kwandura ku Isi barasaga miriyoni 77 barimo abasaga miriyoni 54 bakize n’abapfuye barenga miriyoni imwe n’ibihumbi 698.
Ubwanditsi@umuringanews.com
